آخرین مطالب
امکانات وب
آناوین قدرینی بیل نعمت عظمادی آنا
دنیادا نازینی چک، عزّت عقبادی آنا
قیل احادیثه نظر گور ندی اسرار بهشت
بویوروب ختم رُسل سرور و سالار بهشت
آنانین گُل ایاقی آتدادی گلزار بهشت
جنّت آختارسان اگر جنّت العلادی آنا
آنا بیر گلدی ائدر عمریده بیر دفعه بهار
دولانون باشینه بلبل کیمی هر لیل و نهار
راضی اولماز ایاقیندا بالانین گورسنه خار
منبع مهر و وفا مظهر تقوادی آنا
حاجی‌لار بوسه وورار کعبه‌نین اَسود داشینا
منده لبّیک دئیوب غرق اولارام گوز یاشینا
یدّی دفعه آنامین گونده دولاننام باشینا
که قداستده منه کعبه‌دن اولادی آنا
ایاقین ئوپ الین ئوپ ایله محبّت آناوا
خدمتون معرفتون اولموش عبادت آناوا
قوجالوب دوت الینی ایله حمایت آناوا
دردووه بیل ایکی دنیاده مداوادی آنا
دوقّوز آی ساخلادی بطنینده سنی زحمتیلن
قویمادی صدمه یئتیشسین بالایا آفتیلن
وضع حمل ایلدی آخرده نه کیفیّتیلن
معدن صدق و صفا، صبریده دریادی آنا
وئردی دلدن سنه جان شیره‌سینی رغبتیلن
دیندیریبدی سنی هر لحظه شیرین صحبتیلن
ائتدی آغوشینی گهواره سنه رأفتیلن
نازووی چکمگه هر لحظه مهیّادی آنا
گئجه‌لر گوزلری شیرین یوخویا حسرت اولوب
سنی راحت ایلینجه ئوزی ناراحت اولوب
شور گوز یاشی مذاقینده شیرین شربت اولوب
آفرینشده سنه راز معمّادی آنا
سنه لای‌لای دئیوب آهسته یاتوب دینمیه‌سن
قویمیوبدی قوجاقیندان یئره دیسگینمیه‌سن
کیچیک اللهدی سنه ، جهل آتینا مینمیه‌سن
عاطفه صورتینه جلوه‌لی معنادی آنا
بالا هر لحظه گلوب منزله سسلنسه آنا
سرعتیله دئیه‌جاق فوری جوابینده جانا
دانیشاندا او آجیخلانما یوزون دوتما یانا
دالدالان کولگه‌سینه نخله‌ی طوبادی آنا
یولا وئر یولدادی یورقون یورولوبدی یولا سال
قوجالوب، قلبی سنیخدی یازیقین گویلینی آل
بیرده دنیا ننه دوغماز سنه ئوز فکریوه قال
سئور اولادی، جانوندان سنه اولادی آنا
واردی بئش منظره انساندان ائدر رفع ملال
کعبه، قرآندی، گلستان و گل و ، ماء زلال
آتادان یا آنادان ایلیه‌سن سیر جمال
باخ سارالمیش یوزینه سیر تماشادی آنادی
سن مبادا آناوین دردسریندن دویاسان
سالمندانه قویوب اوزگه‌لره تاپشوراسان
ئوز عیالوندن اوتور قلبین اونون سیندیراسان
مَحک سنگ تولّا و تبرّادی آنا
بیز حسین عاشقی‌یوخ شیعه‌ی اثنی عَشروخ
دینیمیز دین محمّددی بونا مُفتخروخ
اهل‌بیتین آدینا عشقیله قربان کسروخ
آتامیز شیرخدادور، بیزه زهرادی آنا
تا آنان ساغدی اونون قدرینی بیل(فرهادی)
گئتسه دنیادن ایشون ناله و واویلادی
آنا بیر درّ گرانمایه‌دی چوخ والادی
منزلتده دئیرم عرشیدن اعلادی آنا
شاعر : فرهادی مراغه‌ای
موضوعات مرتبط: شعرفراق مادرترکی
برچسب‌ها: شعرترکی_شعرترکی درمقام مادر_فرهادی مراغه‌ای آوای فراق...
برچسب : نویسنده : avayfaraga بازدید : 345